圈中唔少男星近來除咗鍾意操肌晒身材外,亦好鍾意反串喎,好似今日生日嘅DJ林盛斌(Bob)易服成癮,經常喺微博晒重口味反串相,捧腹之餘亦甚為難頂,尤其係個露毛胖新娘打扮,直頭係近期重口味之最。除了Bob外,余文樂亦曾喺電影反串女人扮王馨平唱《別問我是誰》,大獲好評,令人笑破肚皮。

台灣男星又點呢?靚仔爹哋林志穎曾反串扮女人,造型相當嬌俏,「索」過唔少女星添﹗而同林志穎份屬好友嘅羅志祥(小豬),出名扮鬼扮馬,今日佢喺微博貼咗張「靚女相」,仲化身「羅妹妹」,溫馨提示叫大家食飯喎,(但大家食得落嘛?)。而呢張相驟眼睇,竟然同官恩娜有幾分相似喎。

相中小豬留長髮齊陰,出奇地美麗動人,笑容可掬,加埋無敵美圖秀秀效果,唔細心睇又真係難分雌雄,照片一出就惹瘋傳,唔少豬迷都激讚,但有人笑稱:「你不要再搞啦,我們承認你最美行麼﹗」係咯﹗見好就收咯。

hk.apple.nextmedia.com/enews/realtime/20130924/51754522/

Tagged with →